Productos Tubularesen bulego-eraikina birgaitu egingo da
Udalak jarduera horretarako lizentzia eman du, eta, horren bidez, industria eremu hori berraktibatzen jarraituko da.
Sestaoko Udalak hirigintza-lizentzia eman du Productos Tubulares lantegi zaharraren bulego-eraikina birgaitzeko, eta, horrela, industria-instalazio horiek berregokitzeko prozesuan aurrera egin du, konpainiaren jarduerara egokitzeko. Baimen hori joan den apirilean fibrozementuzko estalkia ordezteko eta erabiltzen ez diren ekipoak kentzeko emandakoari gehitzen zaio, industria-gunea berreskuratzeko eta balioztatzeko proiektuari jarraipena emanez.
Jarduketaren aurrekontua 1.597.745 eurokoa da, eta bere helburua eraikina egungo funtzionaltasun-, segurtasun-, bizigarritasun- eta osasungarritasun-baldintzetara egokitzea da. Obrak lehendik dauden bulegoetan egingo dira, jarduera nagusiari lotuta, eraikigarritasuna handitu gabe eta hirigintza-erabilera aldatu gabe.
Proiektuak higiezinaren baldintza orokorrak hobetzea aurreikusten du, inguratzailearen, barne-zatiketaren, akaberen eta saneamendu, iturgintza, elektrizitate, klimatizazio eta telekomunikazioetako instalazioen gaineko jarduketak barne. Era berean, eraikina segurtasunari, irisgarritasunari, suteen prebentzioari, energia-eraginkortasunari eta osasungarritasunari buruz indarrean dagoen araudira egokitzea aurreikusten da.
Sestaoko alkate Gorka Alvarezek nabarmendu duenez, “lizentzia horrek berresten du Sestaoko industria-gune zaharrek oraina eta etorkizuna izaten jarraitzen dutela”. Ildo horretan, azpimarratu du “gure udalerriak industria-historia oso indartsua duela, baina, era berean, gaitasun handia duela jarduera ekonomikoa, enplegua eta aukerak espazio horietatik sortzen jarraitzeko”.
Álvarezek adierazi duenez, “Productos Tubulares bezalako eremuak suspertzea estrategikoa da Sestaorentzat, lehendik dauden lurzoruak eta instalazioak aprobetxatzea, haien baldintzak hobetzea eta udalerrian jarduera ekonomikoa finkatzen jarraitzea ahalbidetzen duelako”.
Lizentziaren arabera, lanak jakinarazpena jaso eta bi hilabeteko epean hasi beharko dira, eta zortzi hilabeteko epean amaitu. Gainera, baimena emateko, eskatutako dokumentazio teknikoa, eraikuntza- eta eraispen-hondakinen kudeaketa egokia eta udal-zerbitzu teknikoek ezarritako gainerako baldintzak bete beharko dira.
Jarduera horrekin, Sestaoko Udalak aurrera egiten jarraitzen du hiri-berroneratzera, industria-eremuak berreskuratzera eta udalerriarentzako aukera ekonomikoko eremu berriak sortzera bideratutako lan-ildo batean.
Sestaon albiste gehiago
Las Llanas pilotalekuko eguzki-plakak martxan jarri dira
Panel fotovoltaikoek energia garbia ekoizten dute dagoeneko, eta sortzen duten soberakina sare elektrikora eramango da; beraz, Udala deskontuekin…
Sestao Riverrek hasiera emango dio denboraldiaurreari bederatzi lagunarterekin
Talde berde-beltzak, iragan denboraldiko zazpi jokalarik bakarrik jarraitzen duten plantillarekin, uztailaren 22an egingo du debuta Athleticen aurka,…